نظرت في الملكوت كتير و انشغلت
وبكل كلمة ليه و عشان ايه سألت
أخرج و حيرتي أشد مما دخلت
أخرج و حيرتي أشد مما دخلت
عجبي
غدر الزمان يا قلبي مالهوش أمان
وحاييجي يوم تحتاج لحبة إيمان
قلبي ارتجف و سألني آآمن بإيه ؟
آآمن بإيه محتار بقالي زمان
عجبي
و الكون دا كيف موجود من غير حدود
وفيه عقارب ليه و تعابين و دود
عالم مجرب فات و قال سلامات
ده ياما فيه سؤالات من غير ردود
عجبي
يا قرص شمس مالهش قبة سما
ياورد من غير أرض شب و نما
يا أي معنى جميل سمعنا عليه
الخلق ليه عايشين حياة مؤلمة ؟
عجبي
على بعد مليون ميل من أرضنا
من الفراغ الكوني بصيت أنا
لا شفت فرق ما بين جبال أو بحور
ولا شفت فرق مابين عذاب أو هنا
عجبي
إنسان أيا إنسان ، ما أجهلك
ما أتفهك في الكون و ما أضألك
شمس و قمر و سدوم و ملايين نجوم
وفاكرها يا موهوم مخلوقة لك ؟
عجبي
حقرا و فوق كوكب حقير محتقر
في الكون تكون دنياكو إيه يا بقر
رملاية في الصحرا ؟؟ لكن إيش تقول
و الكون بحاله جوه عقل البشر
عجبي
ياللي بتبحث عن إله تعبده
بحث الغريق عن أي شيء ينجده
الله جميل و عليم و رحمن و رحيم
احمل صفاته و انت راح توجده
عجبي
البط شال عدى الجبال و البحور
ياما نفسي أهج ، أحج ويا الطيور
أوصيك يا ربي لما أموت ، و النبي
ما تودينيش للجنة ، للجنة سور
عجبي
No comments:
Post a Comment